Бөтендөнья Татар Шурасының Татарстан Республикасы Рәисе Рөстәм Миңнехановка сәяси тоткын Азат Мифтаховка бәйле вәзгыять турында мөрәҗәгате

Мөрәҗәгать

Хөрмәтле Рөстәм Нургали улы!

Бөтендөнья Татар Шурасы исеменнән Сезгә якташыбыз, яшь галим-математик Азат Мифтахов эше уңаеннан мөрәҗәгать итәбез. Безнең тирән ышануыбызча, ул гаделсез һәм сәяси мотивланган эзәрлекләү корбанына әйләнде.

Бүген сүз инде бер кешенең язмышы турында гына бармый. Сүз Татарстанның үз улын ачыктан-ачык гаделсезлек һәм чикләнмәгән золым шартларында яклый алу-алмавы турында бара. Мондый хәлләрдә дәшми калу ризалык һәм катнашлык билгесе булып кабул ителә.

Азат Мифтахов — актив тормыш позициясенә ия талантлы галим һәм һич кенә дә җинаятьче түгел. Әмма аның акылын һәм кешелек дәрәҗәсен хөрмәтләү урынына, дәүләт машинасы аны еллар буе басымга, изоляциягә һәм кимсетүгә дучар итә. Без моның аның милли чыгышы белән дә бәйле булуын кире какмыйбыз. Аеруча аның Котып артына урнашкан ИК-18 колониясенә җибәрелүе зур ризасызлык тудыра — бу гаиләсеннән һәм туган йортыннан меңләгән чакрым ераклыктагы иң кырыс һәм кешелексез шартларның берсе.

Без татар кешесенең, галимнең һәм якташыбызның мондый мыскыллы мөнәсәбәткә дучар булуын кабул итә алмыйбыз, шул ук вакытта республика җитәкчелеге дәшми калуны өстен күрә. Закон тоткыннарны мөмкин кадәр яшәү урынына якын тотуны турыдан-туры таләп итә. Бу таләпне санга сукмау — кешелеклелек принципларын гына түгел (әгәр алар бүген илдә әле гамәлдә булса), законның үз хәрефен дә аңлы рәвештә бозу дигән сүз.

Бу вәзгыятьне бөтен дөньядагы татарлар гына түгел, башка халык вәкилләре дә игътибар белән күзәтә. Җәмәгатьчелекнең ризасызлыгы арта бара. Ахыр чиктә кешеләр җансыз тантаналарны, сабантуйларны һәм рәсми хисапларны түгел, ә милләт намусын якларга батырчылык иткән кешеләрне истә калдырачак.

Шуңа күрә без Сездән Азат Мифтаховны ИК-18гә этаплауны туктату, аның законлы хокукларын тәэмин итү һәм аны мөмкин кадәр гаиләсенә һәм туган йортына якынрак урынга күчерү өчен булган барлык сәяси, административ һәм җәмәгать ресурсларын куллануыгызны сорыйбыз.

Без әлеге гаделсезлеккә карата ачык җәмәгать позициясе белдерүне мөһим дип саныйбыз.

Тарих күп тапкырлар күрсәткәнчә, сәяси вәзгыятьләр уза, әмма үз халкыңа мөнәсәбәт һәм аны яклый белү мәңгелеккә кала. Киләчәк буыннар кешеләрне нәкъ менә шундый гамәлләре буенча бәяли. Без Сезнең вөҗданыгызга һәм батырлыгыгызга мөрәҗәгать итәбез. Татар халкының мәшһүр әйтеме бар: «Ил терәге — ир, ир терәге — ил».

Ихтирам белән,

Бөтендөнья Татар Шурасы әгъзалары