«Хәтер көне. Казан ханлыгы һәм хәзерге Татарстан. Казан 1552–2025» конференциясе материаллары җыентыгы чыкты
- Jul 19
- 1 min read
Әлеге җыентыкта 2025 елның 12 октябрендә Татар шурасы тарафыннан оештырылган «Хәтер көне. Казан ханлыгы һәм хәзерге Татарстан. Казан 1552–2025» исемле халыкара онлайн-конференция материалларының текст варианты тәкъдим ителә.
Конференция Хәтер көне — 1552 елның октябрендә Казанны Мәскәү дәүләте гаскәрләренең һөҗүменнән саклаганда һәлак булган Казан ханлыгы сакчыларын искә алу көненә багышланды. Бу истәлекле көн татар халкының тарихи хәтерендә аерым урын алып тора һәм тарихны фәнни яктан бәяләү, мирасны, милли мәдәниятебезне һәм милли хәтерне саклау мәсьәләләре буенча фикер алышу өчен яхшы бер форсат.
Конференция эшендә Австралия, Төркия, Казакъстан, Грузия, Канада һәм Ауропаның берничә иленнән тарихчылар, тикшеренүчеләр, җәмәгать эшлеклеләре һәм бәйсез экспертлар катнашты.
Докладларда Казан ханлыгы тарихы, аның җимерелүенең сәбәпләре һәм нәтиҗәләре, 1552 ел вакыйгаларының тарихи хәтердә һәм тарихнамәдә бәяләнеше, шулай ук аларның хәзерге Татарстан һәм татар диаспорасы өчен әһәмияте каралды. Аерым игътибар татар халкының бүгенге хәленә, милли үзенчәлекне, телне һәм мәдәниятне саклау мәсьәләләренә, шулай ук XXI гасырда татар милләте алдында торган проблемаларга һәм сынауларга бирелде.
Җыентык материаллары рус һәм татар телләрендә басыла. Бу конференциянең халыкара характерын чагылдыра.
Татар шурасы конференцияне әзерләүдә һәм үткәрүдә өлеш керткән барлык катнашучыларга, чыгыш ясаучыларга һәм авторларга ихлас рәхмәтен белдерә. Әлеге җыентык Казан ханлыгы тарихын тирәнтен өйрәнүгә, тарихи хәтерне саклауга, татар халкының милли бердәмлеген ныгытуга, милли яңарышына һәм милли үзаңын үстерүгә хезмәт итәр дип өметләнәбез. Конференция материаллары җыентыгы белән тулысынча монда таныша аласыз::
