Дөнья татарлары шурасының балкар халкына мөрәҗәгатедепортациянең 82 еллыгы уңаеннан

Кадерле кардәшләребез, туган балкар халкының ул-кызлары!

Бүген, 8 март көнне, мөселманнар өчен изге Рамазан айы көннәрендә, без сезнең белән бергә дога кылабыз һәм XX гасырның иң фаҗигале вакыйгаларының берсендә һәлак булган гаепсез корбаннарны искә алабыз. Нәкъ 82 ел элек, 1944 елда, сезнең халык туган җиреннән көчләп һәм рәхимсез рәвештә сөргенгә куылды.

«Чечевица» (яки «Төньяк Кавказ-455») операциясе берничә сәгать эчендә үткәрелде. Ул тарихта зур гаделсезлек һәм сталин режимының җинаяте буларак калды: 14 эшелон, һәркайсында 56 вагон, төн уртасында уятылган кешеләр белән тутырылган. Аларга җыенырга нибары ике сәгать кенә бирелде. Барысын да сөрделәр: картларны, хатын-кызларны, балаларны.

Аеруча әрнеткеч нәрсә — җәза бирүчеләрнең цинизмы. Нәкъ шул ук көнне, меңләгән балкар гаиләләре салкын товар вагоннарында билгесезлеккә таба барганда, бу операцияне оештыручылар дәүләт бүләкләре алды. Бу — халык йөрәгендә дистәләрчә еллар буе сакланган тирән яра.

Без балкар халкының батырлыгына һәм ныклыгына сокланабыз. Алар еллар буе горур рухларын һәм гаделлеккә ышанычларын саклап калды. Балкарлар Төньяк Кавказда яшәсә дә, без бик якын. Телләребез диярлек бертөрле, мәдәниятебез охшаш, динебез бер, тамырларыбыз уртак.

Без сезнең белән, кадерле балкарлар! Сезнең кайгы — безнең уртак кайгы, ә сезнең көч — безнең уртак горурлык.

Халыкларыбызга гаделлек һәм тынычлык!

Безнең көч — бердәмлектә!

08.03.2026